Arachnophobia

蛇蟲鼠蟻我都唔怕，唯獨是蜘蛛 ------- 我的死穴。

我想每人都有 phobia，好多時都追索到原因。

我大概 4,5 歲時爸爸帶我行山。行到山上突然發現到處都有大蜘蛛。我記憶中啲大蜘蛛仲係彩色嘅。嚇到癲啦。跟住嘅記憶係我要騎爸爸膊馬。難為爸爸，我還清楚記得我用手捉住爸爸耳仔，一路聽到爸爸行到喘哂氣，孭到我落山呀。

另一次令我怕蜘蛛的事亦發生於兒時。同爸爸 and 堂家姐去尖沙咀中間道停車場攞車。懶叻行先, 行到兩架車中間突然比啲嘢罩住塊面。即刻大喊啦。爸爸安慰我，"無嘢無嘢，塵嚟嘅啫。"  點知堂家姐話，"我見到粒黑色嘢喺個網到架。"   再大喊！

Dondon 大大隻，但佢好怕所有昆蟲類，其中蜘蛛亦同樣是他死穴。

他的童年陰影比我的更戲劇化更嚇人。

話說他小時住大陸。有一日瞓晏覺，瞓瞓吓佢表弟篤醒佢，篤完即刻跑開 (有義氣) . Dondon 坐起身，發覺自己全身全塊面爬滿小蜘蛛。已經嚇到大喊，這時 Dondon 望望他身邊。。。。有隻手掌般大的黑蜘蛛媽咪盯實佢。Dondon 仲話記得隻媽咪對眼好大同充滿仇恨。

以上故事唔知有無隨著時間越講越誇張，但肯定的是童年陰影好難抹去。