我好少同人提我既過去，但係今日可以話係我既轉捩點。。。
因為由幼稚園到中學都讀女校，我既初戀發生得好遲，係係大學二年班。同佢一直拍左十年拖，其間估然有唔少風浪，但到頭黎都係同返佢一齊，佢對我黎講已經好似我屋企人咁。我唔會估到我屋企人會傷害我，唉，就好似睇戲咁，有一次我同朋友食飯竟然撞到佢同另一個女人一齊。我走上前質問佢，佢語無論次咁又唔係唔認，又唔係認咁。結過我地係呢次之後就無再見面，已我就把心一橫走左黎美國。
件事都過左成4年喇，我亦已經有噹噹。但係心底裡面依然流緊血 - 好唔明一個同你一齊將大，一齊經歷咁多，一個你咁相信既人會咁對你。真希係好難令我再信人，就算係噹噹我都一直有保留。
直到今日，我聽到佢結婚既消息。可以話係百感交雜 - 有一點失落，有一點好似一齊從頭開始咁。但係我知由今日起，我會對自己好d，要嘗試再去放膽愛，咁對噹噹同自己都公平d。
噹噹，小心呀，好多愛又等如好多要求架，嘩哈哈哈。而阿ex，我祝福你同你太太，白頭到老。
今日煮左沙嗲牛，沙嗲雞，馬拉棧通菜同冬蔭公湯。一路食一路睇泰國戲。齣 Tom Yum Goong 以前晌戲院睇過，d 打鬥場面好勁，Tony Jaa d 功夫同我偶像李連杰有得揮。
朦茶茶沙嗲牛，沙嗲雞。醃足一日，唔錯架。
朦茶茶沙嗲醬
晌呢度買通菜都幾貴，又迫你買大大扎喎。呢度煮左一半都無，成扎差唔多成十蚊美金。
個朦茶茶冬蔭公湯係現成成pack買，淨係需要加蝦同草菇。酸尾尾咁。
諗住乖乖地唔再小器，點知xmas eve 都要黎返次。
話說同噹噹買完送返佢屋企途中塞車，我悶悶地就多口問噹噹，"噹噹呀，你有無試過上網識女仔再出黎見面呀？" 其實我係expect 佢答我 "梗係無喇。" 點知佢話，"一次"。
嘩，唔講尤自可，一比我知道我就發顛。可能我屬於老一代同多疑喇，向網上結識異性再發展到出黎見面係好唔正經既事。個女人仲要係深圳女人，一個對我黎講係無法無天，龍蛇混集既地方。
再問落去 "幾時既事 ？ " 噹噹已經口窒窒 "一。。。 一年前倒喇。" 一年前 ？! ？! 當時我地已經拍拖拍到如火如荼架喎。第二輪既發顛又開始。噹噹嚇到語無倫次，"呀，兩年。。。呀，三年呀好似。。。。呀，唔係，係好耐喇，呀，定四年呢 ？無啦無啦，無再接觸啦。我話比佢聽我有好朋友喇"
我唔會咁易放過噹噹既。"最後一次幾時IM過 ？" "幾個月前，佢問我結左婚未。" 你老板丫，唔該你呢d女人放過屬於其他人既男人喇。
之後噹噹震足半個鐘，亦應承唔會再同網友見面。我睇我已經嚇夠佢喇，於是扮忘記以前繼續慶祝聖誕。但係我知小心吼住佢將會係我一世都要做既事。
好多人會話 "男人愛你就唔會滾。""係你就係你，佢係爛滾你阻止唔到。"會變心既男人你都唔想留喇。" "我對佢有信心。"
我個人睇法唔同，我會相信世事無絕對，但係好多野我可以用小心既方法去預防。
天氣好好，一早噹噹過黎食早餐，犀利囉 - 半罐午餐肉，兩隻煎蛋，一個公仔麵，一個出前一丁，半磅白菜，一杯大奶茶。噹噹羅使晒佢d污遭衫黎我度洗。等緊個陣拆禮物。係佢拆至喎。我之前幾日已經開始準備 - 去唔同既舖頭買唔同牌子啤酒，買咭 同買左個健身野。我呢？毛都無條。我唔介意無禮物架。我只希望噹噹專專一一，我乜野都唔洗要。
洗完衫我地搭地鐵去Rockefeller Center睇聖誕樹。好迫好迫呀，但係咁至如有氣氛嘛。
排隊溜冰條隊成條街咁長，我諗要排幾個鐘至溜到幾分鐘。排隊睇 saks 5th 個櫥窗又係打晒蛇餅。
卡地亞間舖變左份禮物。
舊老細晌五年前離開new york返新加坡。我跟呢個老闆足足成十年。佢可以話係我既老師，恩人，朋友。最初係佢帶我黎美國，晌我最失意既時候亦好多謝佢鼓勵我。當我知道佢要離開，我傷心到丫。
五年後既今日佢黎new york公幹，我地定當然把握見面機會，仲要介紹噹噹比佢識。晌短短既兩小時我地傾左好多，佢同噹噹又好好傾。好懷念同佢做野既日子呀。真係好好彩我曾經有一個如此talented既老闆。仲要係一個好有heart既人，世間少有呀。我衷心希夢望佢成功，快樂。
哈哈，老細問我係新加坡要乜，堅持要買野比我。為左唔會徙佢錢同時間，我就話要個懾石喇。點知佢竟然。。。。。。
老細，返新加坡一路順風呀。咩時候需要我就打比我，我立即飛過黎架。
我平時係公司唔多出聲，又唔多合群。同鬼佬同事關係係君子之交淡如水個隻。點知今日無端端成班同事操黎我個位度，送張咭同盒朱古力比我，仲夾錢買了張$500 gift coupon。嘩，感動得我丫。以一個咁傳統中國既我，完全唔識比反應，淨係識係咁講thank you. 好，今晚一於寫返封感人肺俯既thank you email, send 出去咪唔怕尷尬囉？
一口氣買了好多野。其實無一樣係必需品。咁既經濟環境下，我都好應該推動下銷費。
原價$250，減到$125，再變到$80，最後對鞋以$45引誘到我。
係冬天買夏天衫就最抵架喇。
Basic black turtle neck。咦，我好似最少有4/5 件添。
狗仔睡衣暖笠笠
唔。。。。大家有心理準備呀，好肉麻架。。。
雖然我生日晌香港無同噹噹過，我返黎都有補返數。
好估唔到，又好感動，噹噹竟然會寫咁既野。我希望佢會遵守承諾喇。
一份浪漫禮物 - 殺菌既uvc棒。未聽過，唔好用完生癌就得勒。
仲有玫瑰
多謝噹噹，我呢個生日好開心，好感動，好滿足。
我已經每年返香港最少兩次。今次由香港返黎好唔捨得，始終香港至係我個家，又有我最愛既家人。琴晚整晚發夢同佢地一齊，省黎枕頭都喊濕埋。今朝五點起身就猛睇住屋企個webcam.
我晌 New York 都算有噹噹，又有份他他調調既工，家姐又係附近，但係點解個我都好似唔夠快樂既呢？係咪應該放棄哩道既野返歸哩？
快樂回憶
細佬晌道既一個月一直用住部電腦，於是我就無時間上網。之後我去Toronto探女麻女麻，再之後又返香港兩個禮拜。我過了兩個星期朝7晚11既全職買手生活。嘩，空gib去，滿滿兩gib返呀。咁既解釋希望大家接受啦。
Post下一d相做證據先 -
同細佬晌Madison Square Garden睇Knicks
同家人朋友晌香港慶祝生日
搞足成朝。哈哈，細佬都仲係香港未上機。我聽日要返工無時間準備，唯有提早今日煮定先。希望d食送一日之後入味d喇。
買得一磅牛腩咋。我都唔識揀點至係靚既牛腩。白色個塊咩黎架？
蘿蔔我有上網學點揀，重身就好。呢個都好似幾好。
又係上網羅食譜。又開又熄個火，再加冰糖，兩個鐘就有好淋既牛腩勒。
落重料既羅宋湯 - 牛輾，紅蘿蔔，蕃茄，西芹，薯仔，蒜頭，紅聰頭，粟米，紅菜頭，青豆。下次唔好落太多粟米，陣粟米味太大喇。
主角出場 - 醃足兩日既雞翼。好彩無犯翼王大忌 - 雞皮黐鑊。細佬話食雞唔食皮，做人仲有咩樂趣哩？
好開心呀。聽晚接完機我一定係呢道寫低個過程既。
好開心，我細佬星期一就到紐約喇。細佬係我一生最緊要既人，真係無任何人或事比佢更重要。我希望佢黎到呢個月會開開心心，解決晒d問題。
之前大把野要準備 - 羅錢，買gift card, 配門匙，洗衫，洗床鋪，洗被，連sofa套都洗埋，仲要執好個恐怖衣櫃。又要買定支裝可樂，Snapple, Tropicana, 唯他lemon tea, 豬肉鬆，牛肉乾，介辣青豆，最抵死係我要開始整定炆雞翼，籮白牛腩同煲定羅宋湯。我想d牛腩淋d，湯入味d，而雞翼要最少醃兩日係我細佬 - 雞翼王既最低要求。
雞翼王曾經誇口話自己可以食出醃一日同醃兩日雞翼味度既分別，亦催虛過自己已經試過晒"一百種雞翼煮法"。
哪，如果到星期一d野壞晒唔關我事架。
幣，大家有無見到中間隻雞翼有少少地方無醃到呀？唔知翼王會唔會退貨哩？
姨甥女六歲生日，晌Pump It Up攪生日會，好多小朋友到。我同噹噹由New York楂去Boston就係得登為佢。幸福到丫。我意思係我幸福呀。噹噹楂足四個鐘頭車送我去，沿途仲要食佢至憎既老麥。去到成十一點，仲肚屙添。不過佢知我開心佢完全唔介意，我好感動，亦好膽心佢會有變既一日，係咪諗得多得濟呢？
小朋友排隊準備去跳彈床。
晌地下至大個份我送架，係個電子結他。嘻嘻，咁嘈，佢呀媽曾死我呀。
