開年飯 with Dondon 屋企人

今年已經係第三年同Dondon屋企人過新年。唔知係咪大陸唔興，佢地父母唔派利是的。

下晝開始準備開年飯 -

干燒伊麵~~~

切草菇

韭黃

伊麵

製成品，真不俗啊。

本來蒸雞，但冬冬提醒我豉油雞比較易整。我無用現成豉油雞汁，自己上網抄recipe。

整出黎好似樣架，可惜。。。。

Dondon斬雞時候破壞左我既心血。係咪離譜丫，成隻雞切得個十舊。睇睇個背脊，成條龍船咁，叫人點夾？

 

細佬夜晚打黎問我豉油雞recipe。佢一向唔會亦唔識煮飯，我於是就以專家口吻話比佢知。今朝細佬send佢整既雞比我。無天理呀!!! 點解咁靚既？唔係又係同一個整法？我死都唔同佢分享我隻龍船雞d相架勒。

細佬整既豉油雞

2/5/2011 SATURDAY DINNER 開年飯。

有霽，蓮藕湯，菜膽髮菜綾魚球蠔豉，雞，酸蘿蔔，荀絲，蒸雪魚，炆魚骨，無影相既焗stuffed clam，海蝦，及最受歡迎既伊麵，好野!

朦查查全家幅

右邊個個係Dondon大佬。佢好得意架。我都叫好節儉的了，但係比起Dondon大佬我係小毛見大毛 - 好似今晚話每人都帶d食物。Dondon負責雞，麵同條鱈魚，佢大佬就帶左。。。半個密瓜，仲櫪晒所有食淨既送返屋企添。Dondon阿嫂話比我知佢地拍拖個時出親街都AA制。我覺得呢個阿哥實在係有趣。

 

2/6/2011 SUNDAY LUNCH

榨菜牛肉粥

霽

Dondon媽咪蒸既蘿蔔+芋頭糕

2/6/2011 SUNDAY DINNER

韭黃炒蛋

豆卜燒肉。用白切肉焗，叻!

菜乾湯

Dondon媽咪話我成日手凍腳凍，整左糯米紅豆糕比我，多謝auntie!

 

 

下世唔做雞

黎緊星期六要去Dondon爸爸媽咪屋企食開年飯。Dondon幫我報名負責煮雞，魚同乾燒伊麵。佢阿哥同阿嫂負責買生果。

3 樣都係簡單送，但係Dondon想用最好既材料。魚梗係要游水魚，又要買大大條喎。可惜呢度d魚名同香港完全唔同，再加上英文翻譯同串錯字，令我非常混淆。魚都係睇下jack，留返星期六先買。

跟住要諗隻雞勒。係人都知係美洲d雞係無味兼鞋拾拾。我盡人事上網抄下，又比我搵到有"活殺雞"買喎。抄抵地址，今晚就同左Dondon去探險。

個地方係d唔係太安全既區。入夜鬼影都無隻。兜左幾個圈終於搵到。

嘩，裡面環境，令我諗起SAW呢套恐怖片。d臭味比香港街市無得比，臭一萬倍。係度生活d雞好慘，真係零願快d比人揀去膛。

雞毛周圍飛。成地雞糞，仲有d走犯到處行。

有兔仔呀。咁得意，點殺得落手？

鴨又有

個店員幫我地揀左隻母雞。$1.95一磅，隻雞十蚊都唔使，比香港平好多。比完錢隻雞就被櫪左入屠房。

買完出黎，咦？咩味？原來係短短15分鐘d臭味已經索左落我件褸度。返6k第一件事 - 洗晒全身d衫+洗頭沖涼，沖走晒d禽流感!

希望下世我唔會做困係籠裡面既雞，鴨，兔仔，亦唔會係要晌屠宰場打工既人。

 

2/4/2011 FRIDAY DINNER

韭菜炒雞雜

沙嗲牛肉+紅蘿蔔+粟米仔

雞茸粟米湯

 

睇下隻雞 - 在吊乾過程中。身材好似幾好。

 

 

年卅晚 摘檳榔

新年快樂，身體健康，萬事如意,

大富大貴!

 

今朝十點打返香港同爸爸媽咪拜個早年，再打比細佬一齊倒數。佢地團年飯好開心，全部人齊齊整整平平安安，又雞又魚。

爸爸媽咪聽日一早返大陸旅行。佢地數年前開始愛上揀中國唔同地方遊歷。爸爸話係個度先感覺到自己既根。話見到中國既山脈植物先覺親切。好可惜我完全分享唔到這份感受。中國大陸對我黎講始終都係禁地一塊。

一放工支箭咁飆返1k準備我同Dondon既二人團年飯。

2/2/2011 WEDNESDAY DINNER

蝦仁炒蛋

生菜蠔豉冬菇

臘/潤腸蒸雞

三絲羹

呢餐好八卦 - 三個送，八隻蝦，三隻蛋，三隻蠔豉，三隻冬菇，八塊菜葉，八舊雞，潤臘/潤腸各切八塊，再加個三絲湯。

祝各位生生發發!